الخميس، 17 سبتمبر 2009

أجمل وأرق النفحات ..

"إن لربكم في أيام دهركم لنفحات ، ألا فتعرضوا لها "..

وما أجمل نفحات العشر الأواخر..

فعلا أحاسيس عالية ومش بنلاقيها كتير في بقية أيام السنة

لما المساجد كلها ما شاء الله من الساعة 12 او 1:00 بالليل تبدأ التهجد..

والناس مقبلة على بيوت الله إما معتكف في المسجد طوال الأيام والليالي العشر .. وإما بيروح شغله الصبح وبيعتكف بالليل .. وإما اللي مش قادر ومش مسموحله يعني يعتكف -أنا مثلا- بيحاول على قد ما يقدر يجتهد في البيت..


وتحس بجد طول الليل ان الدنيا سلام.. والجو هادي ورقيق .. ونسمات السحر والفجر دي بتحس ان فيها رحمة بجد ..

الرياح بتبقى رقيقة ونسمتها خفيفة أوي ومريحة بجد نفسيا جدا..

وحاسس فعلا أن الرياح دي مش جاية من الدنيا ..

لأ .. دي أكيد نازلة فعل من تحت العرش ..عرش الرحمن.. جاية الرياح دي بالرحمة بتتنزل علينا فعلا وبالسكينة بتنزل في قلوبنا ..

وتخيلوا بقى لما الرياح دي تيجي تلاقينا بنصلي وبنبكي وبنستغفر من ذنوبنا .. وبنقرأ ونرتل القرآن الكريم في خشوع .. وبندعي ربنا يرحمنا ويعتقنا من النار ويكتب لنا رضاه والجنة وصحبة الحبيب عنده هناك فوق .. تاخد الرياح كل اللي بنعمله دا وتطع فوق .. في المكان اللي جت منه..هناك.. تحت العرش..عرش الرحمن!!

يا الله!! ما أجمل تلك الخواطر!!

وتشعر فعلا بنفحات ربانية تلاحقك في كل لحظة.. ستعود الى الله -بمزاجك أو غصب عنك-أصل فعلا كل موقف فيه رحمة ..سبحان الله!!

يعني مثلا بالنهار طول ما أنت صايم انت في جهاد ورباط وصابر ومستعين بالله .. ومخلص كمان وفي أقوى حالات الإخلاص لله تعالى ودعاءك مستجاب "حتى يفطر" وبطبيعة الانسان لما يتقفل عنده مجرى الطعام والشراب .. هيرتاح الدم في جسمه ومش هيغلي بسبب الشهوات اللي بنستجيب لها في غير أيام الصيام.. وبالتالي الشيطان مش هيتمكن منك ..دا غير إن الشياطين أصلا محبوسة دلوقتي ..

وغير كدا وكدا: أخوك بيقرأ القرآن .. أمك عمالة بتدعي شغالة الله ينور .. وأبوك ماسك السبحة وأختك اللي كانت قدام التلفزيون قامت وبتجاهد علشان تختم القرآن .. فأنت لوحدك هتلاقي نفسك مقبل على الله .. الجو مساعدك من الآخر.. ودا جو مكنش بيبقى موجود في غير رمضان.

لغاية ما المغرب يأذن .. فرحة بجد.. لما تبدأ تشرب الماية أو تاكل الرطبة أو التمرة .. وتدخل كدا على معدتك الفاضية دي.. بتحس بفرحة رهيبة بجد..وكمان بتحس بنعمة ربنا عز وجل وساعتها بتقدر النعمة دي.. قبل كده كان يجيلنا الأ:ل لغاية عندنا أصناف وألوان ونفسنا مصدودة أو مش عاجبنا أو ..أو .. وفعلا بنرفض النعمة ..لكن دلوقتي لما حسيت بالفرحة الرهيبة دي مع نقطة الماية اللي شربتها أكيد بعد كده هتقدر النعمة كويس أوي ..

وساعة الفطار ليك دعوة مستجابة " في حديث آخر: حين يفطر".. وعيش بقى مع كل طلباتك ونظم أدعيتك يوم ورا يوم في رمضان.

وبالليل بعد الفطار وقت بسيط قبل العشاء يدوبك بنقوم نصلي السنة وبشوف برنامج خواطر 5 على الرسالة أو بلبس والحق اروح المسجد علشان التراويح.

هناك 3 تعليقات:

  1. اللهم اجعل أيامنا كلها رمضان ... وتقبل منا الصيام والقيام ..
    نفحات عطرة وكلمات جميله .. بارك الله لك

    ردحذف
  2. تقبل الله منا ومنكم
    كل عام انتم بخير

    ردحذف
  3. السلام عليكم ورحمة الله وبركاته
    تسر رابطة هويتى إسلامية أن تدعوك للمشاركة فى قص شريط إفتتاح أحد أكبر وأهم مشروعاتها وهو مدونة " إحنا شباب النهارده " من خلال تاج هدية من الرابطة .
    نتمنى قبول التاج ونشر إجابته بمدونتك مشاركة منك فى افتتاح المدونة
    نرجو زيارة المدونة للحصول على أسئلة التاج والإطلاع على كافة التفاصيل حول فكرة المدونة
    مع خالص تحيات
    أسرة رابطة هويتى إسلامية
    فريق عمل إحنا شباب النهارده

    ردحذف

تفضل بتعليق أو مناقشة..بوركتم